Haastateltava: Pekkon Šaška, virall. Aleksandra Fomina (Kuujärvi)
Haastattelu: Kuujärven Joensuu 11.6.1964
Haastattelija: Maija Kuujärveläinen
Julkaistu: Kondan Kalndan. Kujärven lüüdin rahvhansana. Kogonu da toimitanu Obraman Fed’uun Miikul. Helsingi–Võro 2012, s. 131–132
Litteroinut: Miikul Pahomov
Kuva: Joensuun kylän uusi kirkko 1.7.2006 (Miikul Pahomov/Katus)
It’ku roditel’as II
Sula siä, minun roditel’aane,
Kuoliid siä d’o aigaažes,
Diätiid siä meid d’o pikkaraažiid,
Pikku da d’o pikkarašt
Suuren da d’o arteliižen,
Kaik d’o oma hüö
Rostom ne porovn’aaže,
Pienen mecaažen d’o sangevutte,
Ku olnob kotaažen d’o korgevutte.
Olnob ku d’o sinun i da vol’aane,
Tule siä meiden ke d’o pagižemha,
Piästam müö sindaa d’o haudaažehe,
Katam müö d’o kivuziil.
Olnob ku vol’aane,
Ka tule meiden ke d’o pagižemha,
Sanu omad d’o paginaažed,
Müö d’o roskažim silii omad abidaažed,
Mida silaa d’o mieldu olnob.
Vierhad ristuižed d’o zapretupitaa,
Puikuužed meiden piäle hüpnitaze.
Kaik d’o müö nämad pereživim,
Kaik d’o müö da vinesim.
Tule siä, sula roditel’aane,
Kuuz’ nedališt d’o proidib,
Luadim müö d’o silii mur’ginaažen.
Ozitaze meile kuuden nedaliižen sijas
Kuuden d’o vuoduden pidevuz.
Tule siä meiden no paginaažele,
Sula siä d’o roditel’aane.
Kus i d’o siä da ol’ned?
Sill ilmal se mitte silaa eluune olnob?
Roskažid siä d’o meile,
Müö silii d’o roskažim
Kaik abidaažed da kručinaažed.
Kaik olem müö piened da pikkaraažed
Kaik olem müö d’o hubaažed,
Sula roditel’aane.